МОЛИТВА ЦАРЯ ИОАННА ВАСИЛЬЕВИЧА БОЖИЕЙ МАТЕРИ И СВЯТИТЕЛЮ ПЕТРУ, МИТРОПОЛИТУ МОСКОВСКОМУ И ВСЕЯ РОССИИ ЧУДОТВОРЦУ ОБ ИЗБАВЛЕНИИ ОТ БЕЗБОЖНЫХ АГАРЯН
О Пресвятая Госпоже Богородице Владычице, покажи милость на роде християнстем, помиловала еси прадеда нашего Великаго Князя Василия от нахождения поганых от безбожнаго царя Темер-Акъсака, тако и ныне пошли милость Свою на нас на чяд их и избави нас и весь род крестьянский от безбожнаго царя Саип-Гирея, прииде на мя на всю Рускую Землю похваляся, пошли, Царице, милость Свою, да не рекут погании: где есть Бог их, на Него же уповают. И иде ко гробу Петра чюдотворца и с братом своим со князем Юрьем и начят слезы истачяти и Чюдотворца на помощь призывати и рече: О чюдотворныи Петре, призри на нас сирых, осталися есмы от пазухи отца своего и от чрезл матери своея млады, ниоткуду себе на земли утехи не имеем, и ныне прииде на нас великая натуга от бесерменства, и тебе подобает о нас молитися, а вжег тя Бог нам светлую свещу и постави на свешницы, тобя дарова Бог роду нашему и всему православному крестьянству крепкаго стража, не остави нас во время скорби нашея, помоли о нас Бога и о всем роде крестиянстем, да избавит нас от поганых. 1541 |