НА ПЕРЕНЕСЕНИЕ ЧЕСТНЫХ МОЩЕЙ СВЯТЫХ МУЧЕНИКОВ И ИСПОВЕДНИКОВ БЛАГОВЕРНОГО КНЯЗЯ МИХАИЛА ЧЕРНИГОВСКОГО,
И БОЛЯРИНА ЕГО ФЕОДОРА
(ум. 20.9.1246), ЧУДОТВОРЦЕВ

 ТВОРЕНИЕ ИВАНА, БОГОМУДРОГО ЦАРЯ, САМОДЕРЖЦА РОССИЙСКОГО

ТРОПАРЬ

Глас 8-й

     Троичнаго Божества осиянием просветився, пресветле и всеблаженне Великий Княже Михаиле з доблим и всемудрым болярином ти Феодором, ярости нечестиваго царя не убоявшеся, исповедания ради Святыя Троица, самозваннии к подвигом устремистеся и видимому солнцу паче праведнаго солнца Христа не поклонистеся. Кусту ж, и огню, и идолом не поклонистеся, но поплевасте. Крови своих струями обагрившеся, востекосте радостно ко Господу господем и Царю царем, Господу нашему Иисусу Христу в Троице славимому. От Него победная венца прилете и своими кровии страдании тогда всю Русскую землю от нечестия свободисте, тако и ныне своим пришествием нас свыше назирайте, престояще у престола Владыки Христа, моляще Святую Троицу избавитися нам от ходящих ны зол: душевных согрешений, и телесных болезней, и варварскаго нахождения, и межуусобных брани, и всяких скорбей душевных и телесных, и мятежей. Молим вы, святии, яко да вашими молитвами подасть нам вся благая Христос человеколюбец, прославляемый во святых Своих.

КОНДАК

Глас 5-й

     Солнца мысленаго, праведнаго Христа, озарився сиянием пребогате, Михаиле, видимому солнцу не поклонился еси, и твари, паче Творца, не послужил еси, и нечестия обуздал еси. Ярости царя не убоявся и крови своих обагрении предстал еси, радуяся. И ныне в пронесении мощей твоих нас свыше назирай, и Христа Бога нашего молити тебе о нас молимся, яко спастися нам, и державы царствия непоколебимо отечество ваше соблюсти о всех противных иноплеменных и межуусобных ратей, и мятежа, и оскудения, и праведнаго Господня гнева и прещения возвратити, и сохранити Господу Богу нашему Иисусу Христу во всем молитвами твоими святителя же, и царя, и вся люди по велицей Его милости.

ПОСЛАНИЕ
благочестиваго Царя и Великаго Князя
Ивана Васильевича всея Руси
и всего освященнаго собора,
к Великим страстотерпцем
и исповедником:
к Великому Князю Михаилу
Черниговскому
и боярину его Феодору,
имеюще образ сицев:

     Святии Великомученицы и исповединики Господни Благоверный Княже Михаиле, и ты, боярине его Феодоре, понеже веру соблюдосте во Христа Господа нашего в Троицы славимаго, тричисленнаго истиннаго Божества, славу и власть и честь непоколебимую и крепкую силу Отца и Сына и Святаго Духа проповедавше, дерзостне подвиг скончавше, течение совершивше, и своими кровными страдании, Христа Бога нашего истиннаго исповедавше, и нечестие злочестиваго царя возразисте и православие тогда заступисте, от всех многих напастей и бед, душевных же и телесных, видимых и невидимых, иноплеменных нахождение и разорение, и приясте от Бога венцы и царствие безконечное на небесех со всеми святыми страстотерпцы Христови, душевне же и телесне, душевне убо царствия иного неизживущаго приясте; телесне же чудесем дар приясте, кровми Вашими обагрившеся, и Духа Святаго в телесех Ваших живущаго сохраняющаго, и действующа чудесы, имуща отечество Ваше сохраняюще отьтоле и доселе; яко некое молчание бысть. Ныне же при нас убогих и недостойных раб Своих Господу нашему Иисусу Христу за Него же страдавша, произволившу Вас Своих угодников прославити толикими чудесы, и толикое отступников многочисленное воинство, и злокознение их ухищрение Вашими святыми молитвами в Троице славимому Христу Богу нашему, и заступлением ни вочтоже положено бысть Вашими ко Господу молитвами, по глаголющему пророку: сеть сокрушися, мы избавлени быхом, помощь наша во имя Господне, сотворшаго небо и землю. Мы же смиреннии, со отцем своим Митрополитом и со святители и со всем освященным собором, и со иноки, и с бояры, и совсеми православными Христианы, слышавши сия величия Божия и Вашия святыни чудодействия, прославихом славимаго Бога и Спаса нашего Иисуса Христа, прославляющаго Вас, угодников Своих, и радостию духовною возвеселихомся, яко в наша лета Господу нашему Иисусу Христу над нами таковая милосердие Свое содевающе; тем же советовахом, мы смиреннии, со отцем своим Антонием Митрополитом всея Руси и со святители Русский земли и со всем освященным собором и со иноки и с бояры и совсеми православными Христианы, соборне советовавше, к Вам, святии, верою влекомы, желающе Ваша мощи видети в славном граде Москве; тем же соборне единомышлено мы, смиреннии, со отцем своим Антонием Митрополитом всея Руси, и со всеми православными христианы, моление послахом к Вашей святыни, не яко властельски и заповедающе, но яко рабски и припадающе молим Вашу святыню, не яко отшедшим, но яко живых Вас молим. Понеже человеколюбия неизреченнаго Господа нашего Иисуса Христа смотрения устыдестеся и с Ним единение соблюдосте, и заповеди Его сохраняете и пребываете в любви Его; и Господь наш Иисус Христос Вас состави Собе Самому, якоже уды главе, един дух с Ним быстей душ Ваших и телес, или яко исмесися и не токмо живым, но и поскончании Вашем не отступаети, персти Ваша и кости полны Того суть благодати; яко во страшней и животворящей Господа нашего Иисуса Христа смерти блаженней души пречистаго тела отступльше, и божеством не разлучив отбег от него, иже во ядрех сый присносущнаго Отца и душею бе во аде и телом во гробе. Сицем образом душа и телеса Ваша друг друга ближних своих отступиша, Господа же нашего Иисуса Христа неразлучишася, и телеса Ваша своих душ лишени быша; Господа же нашего Иисуса Христа живота истиннаго в себе имате, якоже душа Ваша в Того живут руку; тако и телеса Ваша Того имут жителя, и сего ради демоном страшни и душевный изцелевати струпы и телесный болезни неизцельныя уврачеваете, и дарования духовная и сила вся якоже живым даровавшаго и душ отлучившихся Вас ничтоже лишения имуще являетеся действа ради; якоже Вы извествующе слово еже не ложной обеща: "веруяй в Мя смерти не имать видети во век”, и паки рече: "несть Бог мертвых, но Бог живых”, яко живыми и мертвыми обладая, вси бо тому живи суть; тем же и мы веруем, яко раби есте живаго Бога и сами по смерти живи есте. Якоже и мы Вам молимся к Вашей любве возводяще, презрите беззакония наша, не возгнушайтеся срамных дел наших, очистите согрешения наша, не отыщете в дальняя страны, или в недоведомая места, или в руки отступников, за наша согрешения умолени будите труды своими и поты и заколении кровными, яже ради излиясте за имя Его святое подобящеся Его милосердию; якоже Он человеколюбия ради сниде на землю и воплотися от Пречистый Матере Его, тако Вы подобящеся Вадычно человеколюбию, призрите на наше смирение, услышите моление святительское, и всего освященнаго собора, подадите себе нам не бо властельски заповелеваем, но рабски молим Вы: вдадите себе посланным от нас к Вам; не бо они мощи Ваши принесут, но Вы сами благоизвольно приидете к нам и нас просветите и град сохраните по Божию изволению, изволите с нами в царствующем граде Москве жити, и нас и всего православия сохраняюще, призрите на достояние Христианское и на люди Христианские и подажте мир градовом Христианским; освятите церкви Христианские; облецете иерея в правду; даждьте царем суд; разрушите иноплеменных рати; уставите обдержащии на ны мятежи, и утолите усобныя брани сими всеми и иными Божиими даровании, и нас пришествием своим просветите и впредь просвещайте в славу и хвалу Христу Богу нашему, ниже бо отечество Ваше без сохранения будут, возможно бо Божиею благостию Вашей святыни, яко же молнии повсюду милосердием проницати и охранити, токмо нас не оскорбите и не оставите сирых, приидете к нам благой волением, милостию и человеколюбием, и нас сподобите Вашей святыни благорадостне прославите; Бога ради услышите моление Преосвященнаго Антония Митрополита всеа Русии и всего еже о нем освященнаго собора, и нашего убожества моления и всего православнаго христианства.

1578