СКАЗАНИЕ О ЗАЧАТИИ МОСКВЫ И КРУТИЦКОЙ ЕПИСКОПИИ О ЗАЧАТИИ ЦАРСТВУЮЩАГО ГРАДА МОСКВЫ И О КРУТИЦКОЙ ЕПИСКОПИИ, КАКО БЫСТЬ В лЪто 6714 (1206) князь великий Данил Ивановичь, после Рюрика, короля римскаго въ 14 колене, пришед из Великаго Новаграда в Суздаль. И в Сузъдале родися ему сынъ, князь Георгий, и нареченъ Юрьи. И созда во имя его град Юрьевъ Польской. И в томъ граде церковь велелЪпну созижде во имя Георгия Страстотерпца, каменную, на рези и от подошвы и до верху. И по создании храма того поЪхалъ князь великий Данилъ Ивановичь изыскивати мЪста, гдЪ бы ему создати град престолный к великому княжению своему. И взя съ собою нЪкоего греченина, именемъ Василия, мудра и знающа зЪло и вЪдяща, чему впредь быти. И въЪхавъ с нимъ во островъ теменъ и непроходимъ зЪло. В немъ же болото велико и топко. И посредЪ того болота и острова узрЪлъ князь великий Данилъ Ивановичь звЪря превелика и пречюдна, троеглава и пестра велми пестринами различна и красна зЪло. И вопроси Василия греченина, что есть видЪние се пречюднаго звЪря. И сказа ему Василий греченинъ: «Великий княже, на семъ мЪсте созиждется град превеликъ и распространится царствие троеугольное, и в нем умножатся различных ордъ люди, то есть прообразует звЪря сего троеглавнаго, а различнии на немъ цвЪти — то же есть прообразует различных орд люди». Посемъ князь великий в том же острове наЪхалъ посредЪ болота островъ малъ, а на немъ поставлена хижина мала, а живетъ в ней пустынникъ, а имя ему Букалъ. И потому и хижина именуема Букалова. И нынЪ на том мЪсте божиимъ повелЪнием царской дворъ. И после того князь великий Данила Ивановичь с тЪмъ же греченином Василием спустя 4 дни наЪхали горы, а в горахъ тЪхъ стоитъ хижина мала, а в той хижине человЪк римлянин, имя ему Подонъ. И возлюби князь великий мЪсто сие, и на томъ мЪсте себЪ домъ устроити восхотЪ. Той же мужъ Подонъ исполненъ духа свята и рече: «Князе, не подобаетъ ти здЪ веселитися, то есть мЪсто домъ божий. Созижди ту храмъ, и пребудутъ архиереи бога вышняго служителие». Князь же великий Данилъ Ивановичъ въ 6 лЪто на хижине Букалове заложи град и нарекоша имя ему Москва. А въ 7 лЪто на горахъ Подонских на хижине заложи церковь всемилостиваго Спаса и устрои святолЪпну ю. И въ 9-е лЪто родишася у него два сына, князь АлексЪй, князь Петръ. Онъ же, князь великий Данилъ Ивановичь, любляше сына своего вельми, князь АлексЪя Даниловича, и во имя его созда град к северу и нарече имя ему Алексинъ. И тамо обрЪте во острове мужа именем Сара, земли Иверские, свята и благоговЪйна зЪло, и на его хижине заложи градъ Алексинъ. И по 29 лЪтехъ прииде из грекъ епископъ Варлаамъ к великому князю Данилу Ивановичю и многия чюдотворные мощи с собою принесе. Князь же великий Данило Ивановичь приятъ его съ великою честию и любовию, и повелЪ ему храмъ освятити на горахъ Подонскихъ, и предаст ему область Крутицкую, и нарекоша его владыкою Сарскимъ и Подонскимъ, а горы нарекоша Крутицы. |
